Bylyre Serjanaj says:

Përshëndetje,

Uroj që kjo përgjigje të të gjejë mirë dhe faleminderit që zgjodhe të na shkruaje. Më vjen keq që po vuan dhe mesa duket kjo vuajtje ka ndikuar ose ka rritur mos besimin tënd tek vetja. Gjendjet e ankthit apo depresionit, janë të trajtueshme me anë të ndihmës së duhur. Ti tregon se merr medikamente, por asnjëherë nuk është vonë të fillosh seanca psikoterapie me një psikolog klinik apo psikoterapist. Medikamentet (nëse merren me rekomandimin e mjekut) të ndihmojnë në uljen e intesitetit të simptomave, por njëkohësisht është e nevojshme të punosh me burimin e këtyre simptomave. Në një situatë ankthi, cilat janë mendimet e tua? Sa reale janë këto mendime? A janë të bazuara në fakte të vërteta? Apo janë shqetësime në lidhje me të ardhmen, të cilën askush nuk mund ta parashikojë apo ta ketë nën kontroll? Vër re se si këto mendime ndikojnë në gjendjen tënde emocionale dhe më tej në përjetimin e simptomave fizike. Gjendjet e ankthit dhe depresionit shkaktohen nga mendime jo të vërteta (iracionale) dhe një teknikë e mirë është që ti t’i shkruash këto mendime, ti identifikosh ato dhe të shohësh se sa të mbështetura në realitet janë ato. Qëndro në të tashmen. E tashmja është se ti je studente në një degë të fakultetit të mjekësisë. Para se të shkoje aty, të është dashur ta fitosh këtë degë studimi dhe ia ke dalë. Nga ana tjetër, edhe pse me ankth apo gjendje depresive siç ti thua, edhe pse me medikamente, ti po ia del që të vazhdosh studimet në atë degë. Nëse do të ishte një person i dashur për ty (motra, mikja jote e ngushtë apo një e afërme), në të njëjtën situatë si ti, cfarë do mendoje për të? A do e shihje si të dobët, që pavarsisht vuajtjes së saj, është duke bërë më të mirën e saj? Më vjen mirë që ke rreth teje njerëz që të duan dhe të mirëkuptojnë. Shfrytëzoje dashurinë dhe ndihmën e tyre për të kaluar këtë situatë. Për shembull, i ke pyetur ndonjë herë se si të shohin apo çfarë mendimi kanë ata për gjithë këtë situatë? Në situata ankthi të sugjeroj të përdorësh teknikën e frymëmarrjes së thellë dhe ngadalë, ose disa teknika të tjera të cilat mund të gjenden lehtë në internet dhe përdor atë që përshtatet më shumë tek ti. Siç e kam përmendur më lartë, puna me një psikolog do të ndihmonte. Gjithashtu, ndihu e lirë të më shkruash për çdo shqetësim tëndin.

Gjithë të mirat!
Bylyre Serjanaj, Psikologe Klinike