Bylyre Serjanaj says:

Përshëndetje,

Faleminderit që besove tek ne dhe na shkruajte. Më vjen keq që po vuan. Gjendja e ankthit mund të të bëjë të ndihesh më i dobët, vulnerabël apo sikur nga momenti në moment mund të ndodh diçka e keqe dhe ti nuk mund ta përballosh dot atë. Kjo i ndodh pjesës më të madhe që vuajnë nga simptomat e ankthit.
Ka shumë të rinj që na shkruajnë mbi simptomat e ankthit dhe i frikëson fakti, se sa të fortë janë ata për ta përballuar këtë gjë. Me ndihmën e duhur nga profesionistë të shëndetit mendor, trajtimi i ankthit është i mundur. Mendoje ankthin si një alarm që bie dhe të përgatis ty për dicka. Pra, ankthi është si një meaknizëm mbrojtës, për të të thënë se diçka nuk po shkon në jetën tënde dhe ti duhet të punosh me të. Mund të jetë pasojë e së shkuarës, ose frika për të ardhmen. Shihe ankthin tënd me kuriozitet. E rëndësishme është të kuptosh burimin e ankthit.

Çfarë ka ndodhur para tre muajve? Të kujtohet se kur ke vënë re për herë të parë simptomat e ankthit? Çfarë ke menduar para se të ndiheshe në ankth? Si je ndjerë në ato momente? Përpiqu të identifikosh mendimet e tua. Sa reale janë këto mendime? A bazohen në fakte/ të dhëna të vërteta? Vër re se si mendimet ndikojnë në gjendjen tënde emocionale dhe fizike. Bëje këtë ushtrim edhe me situata të tjera që ti ndjen simptomat e ankthit. Mund t’i shkruash në një ditar mendimet e tua. Ndoshta kjo mund të jetë e vështirë për ta bërë vetë por mund ta bësh me ndihmën e një psikologu klinik/ psikoterapisti. Ndërkohë në momente që ndjen ankth përdor teknika të relaksimit, si:
1. Fokusohu te frymëmarrja. Merr frymë thellë dhe ngadalë. Nxirre frymën po njësoj, ngadalë dhe plotësisht. Bëje këtë ushtrim deri sa të kuptosh që frymë marrja jote është stabilizuar.
2. Fokusohu te shqisat e tua. Vër re tingujt, zhurmat. Identifikoji ato. Çfarë sheh? Prek një objekt. Përshkruaje atë. Çfarë ndjesie të jep?
3. Mendo një vend të qetë për ty. Mund të jetë edhe imagjinar. Përshkruaje këtë vend. Mund të jesh aty me këdo që të bën të ndihesh i qetë dhe i sigurtë.

Meditimi mund të jetë një tjetër teknikë që të ndihmon. Mund të gjesh teknika të tjera në internet në burime të sigurta. Pavarsisht teknikave, të sugjeroj të flasësh me njerëzit e tu të dashur. Mund të ketë nga ata që po e kalojnë ose e kanë kaluar si periudhë dhe mund të të bëjë që të ndihesh i pranuar edhe i sigurtë. Nëse vë re se simptomat e ankthit po ndërhyjnë në përditshmërinë tënde dhe po ta vështirësojnë atë, kërko ndihmën e një profesionisti të shëndetit mendor.
Gjithashtu, ndihu i lirë të më shkruash për pyetje apo për cdo shqetësim tjetër.

Gjithë të mirat!

Bylyre Serjanaj, Psikologe Klinike