MA. Almandina Guma says:

Përshëndetje
Faleminderit për letrën tënde dhe që ne ndave me ne ndjesitë, shqëtësimin dhe konfuzionin e mendimeve të momentit.

Në fakt, përmes letrës tënde, unë kuptoj që kjo është një periudhë e rëndësishme për ty në aspektin e njohjes së vetes, cfarë të pëlqen, të kuptuarit e emocioneve të ndryshme, aq më tepër që marrëdhëniet apo lidhjet dashurore, intime si në aspektin emocional por edhe atë fizik bëhen të rëndësishme në këtë periudhë. E gjitha është një proces njohje e rrugëtimi me veten, kështu që mendoj që është ok në rast se kemi ndjesi e ngacmime të ndryshme, pa i vënë detyrimisht “lupën” me nevojën për të përkufizuar.

Ti përmend në letrën tënde “depresionin” dhe faktin që nuk ke patur një lidhje. Do kisha dashur të kishe shpjeguar më shumë për këto të dyja dhe pse ka ndodh kjo gjë që ende nuk ke patur një lidhje. Ka ndonje hezitim, frikë, pamundësi momentale? Supozoj që shoku yt në një lloj forme të ka ngacmuar duke të quajtur “gay” pikërisht për këtë arsye.
Ndonjëherë ndodh që kur dicka e panjohur (vecanërisht intimiteti emocioanl e fizik) na krijon frikë (në këtë rast një lidhje), truri mund të funksionojë që ta zhvendos ndjesinë në dicka tjetër. Kështu që me kaq sa ti përshkruan mua me duket që je në periudhë të tillë zhvendosjesh, shmangiesh etj.

Gjithsesi, kur flasim për seksualitetin, nënkuptojmë disa aspekte të tij:

Sensualiteti lidhet me ndjesitë që ti ke për trupin tënd dhe trupin e të tjerëve. Sensualiteti përkthehet nëpërmjet ndjesive atraktive për personin tjetër, nevojën për tu prekur (dhe jo vetëm seksualisht), imazhin për trupin, fantazinë.
Intimiteti seksual është të qëndruarit pranë fizikisht me dikë dhe të pranosh të njëjtën gjë prej tij/saj. Kjo përmbledh të provuarit e vulnerabilitetit, rrezikun e e emocioneve e pëlqyeshmërine apo dashurinë e provuar për personin tjetër.
E momenti tjetër është pikërisht identiteti seksual, kur ne formësojmë se cfarë duam e cfarë na tërheq në të vërtet.

Kjo për të të thënë që më shumë se të vendosësh veten në kërkim të përkufizmit të preferencës/drejtimit seksual në bazë të leximeve, ëndërrave e ngacmimeve, përpiqu të vendosësh veten në kërkim të personit që do të bëj të ndihesh mirë, të krijosh një lidhje.
Dil, njih, kupto cfarë do, përpiqu të njohësh veten tënde, nga cfarë shmangesh, cfarë të drejton.
Gjitashtu konfidenca, krijohet e mësohet edhe rrugës duke provuar, dështuar, mësuar apo duke patur sukses në raportet e lidhjet me të tjerët.

Shpresoj të kem mbërrit te ty me reflektimin e duhur,
Të uroj gjithë të mirat më tej dhe je i mirëpritur të na shkruash sa herë të duash,
Me respekt,
Almandina