Aida Yzeiri says:

Përshëndetje e dashur! Të falenderoj, që i je drejtuar faqes së Nuk Je Vetëm.

E hap letrën tënde, duke treguar se ke 5 vite me gjendje ankthioze. Kjo e përkthyer në gjuhën trupore është si të thuash që ke 5 vite në gjendje frike – sepse ankthi është pikërisht gjendje frike bashkëlidhur me mendimet apo pritshmëritë negative për gjëra që mund të ndodhin.

Mund ta perceptoj gjithë lodhjen, që vjen nga të përballurit gjatë gjithë këtyre viteve me ndjenjat e ankthit dhe shqetësimet si këto që përmend, në lidhje me humbjen e vitit shkollor. Diçka tjetër që duhet kuptuar në lidhje me gjendjet ankthioze janë simptomat fizike, si ato që t’i ke përmendur, të cilat e mbajnë trupin në gjendje tensioni dhe axhitimi, që nga ana tjetër ndikon negativisht në proceset e të menduarit dhe si rrjedhojë edhe të të mësuarit. Edhe ecuria jo e mirë në mësime dhe rezultatet e provimeve ndikohen nga kjo. Kështu krijohet një rreth vicioz, ku gjendja e ankthit ndikon negativisht në arritjet akademike dhe pastaj notat e këqia nxisin më tepër ankthin dhe mendimet shqetësuese për provimet e tjera dhe vitin shkollor.
Ti përmend se përpiqesh që ta menaxhosh duke dal dhe duke kryer aktivitete që të mos mbetesh e mbërthyer tek këto mendime negative, kjo është diçka shumë e mirë dhe do të inkurajoja që të vazhdoje t’i ndiqje. Megjithatë për të përballuar në mënyrë më efikase ankthin do duhen përpjekje më të disiplinuara dhe jo vetëm të herëpashershme apo në momentet kritike, kur kaplohesh nga ndjesitë ankthioze.

Së pari, për të tejkaluar ankthin duhet ta kuptosh ankthin tënd. Cilat janë në thelb mendimet apo shqetësimet, që të nxisin krijimin e gjendjes ankthioze?

Më tej duhet punuar me këto mendime penguese/shqetësuese të cilat nxisin akthin për t’i zëvendësuar ato me mendime më pozitive dhe të dobishme. Nëpërmjet praktikimit të vazhdueshëm të këtyre mendimeve të “ri- modeluara” përfitohet një kontroll më i madh mbi mendimet që nxisin ankth dhe gjendjet emocionale që vijnë nga ato mendime.

Njëkohësisht është e rëndësishme edhe praktikimi i mënyrave, që sjellin lehtësim nga gjendja e tensionuar dhe e axhituar trupore dhe emocionet që i bashkëshoqërojnë.
Praktika të lidhura me këtë mund të jenë:
– Teknika të frymëmarrjes e relaksimit trupor.
– Rutinë fjetjeje e mirë, duke fjetur gjumë mjaftueshëm.
– Ushtrime fizike apo të qenit në lëvizje, psh shëtitje sidomos në natyrë.
– Të bërit e një aktiviteti krijues, që të pëlqen si psh. vizatim, ngjyrosje, të shkruarit, të kënduarit, kërcimi, një punë manuale etj si këto, që të bën të fokusohesh tek procesi i krijimit dhe përqëndrimit mendërisht në momentin e tashëm.
– Kërkimi i ndihmës apo mbështetjes nga të tjerët si familjarët apo shoqëria jote e besuar.
– Të mësuarit e vlerësimit pozitiv për veten dhe arritjet e tua dhe praktikimi i shprehjeve pozitive ndaj vetes.
– Zhvillimi i dashamirësisë ndaj vetes në kundërshtim me modalitetin e fajësimit të vetes.

Sigurisht që një profesionist psikolog/psikoterapist mund të ndihmojë më mirë në procesin e të kuptuarit të ankthit dhe të gjetjes e vënies në zbatim të mënyrave më efektive të përballimit dhe rekuperimit ndaj ankthit dhe nëse ke mundësi për të ndjekur do të thoja që do ishte e dobishme që t’i drejtoheshe për këshillim.

Të uroj të jesh sa më mirë dhe suksese në studime!
Aida