MA. Almandina Guma says:

Përshëndetje e dashur,
Faleminderit që na adresove neve konfuzionin e shqetësimin tënd të momentit.

Në letrën tënde, nuk ka shumë informacion për marrëdhëniet e tua të kaluara dhe si kanë qenë ato. Kjo do më ndihmonte të kuptoja më shumë, pasi ndonjëherë pas tyre fshihen mendimet e vërteta e shmangiet që mund ti bëjmë vetes, lëndimet nga e kaluara apo frikërat që mund të kemi.

Gjithsesi, e lexova letrën tënde me shumë interes dhe vëmendje dhe mendoj që në fakt ajo cfarë ti paraqet është një konfuzion për të relatuar, e mbase për të stabilizuar një marrëdhënie të thellë.
Shprehesh që je e bezdisur nga “flutrat” nga “sjelljet”, “që s’do të lëndosh”, e më duket se më shumë të shqetëson pjesa e stabilizimit të intimitetit ( me intimitet nënkuptoj gjithë dimensionet e tij, e mbi të gjitha atë emocional e relacional midis dy personave), pavarësisht nëse intimiteti ndërtohet në një raport heteroseksual apo homoseksual.
Më duket se në letrën tënde ti shpreh më shumë dëshirën për të ndërtuar një raport që do të bëj ty të ndihesh mire, një person që të të kuptoj, me të cilin/të cilën të ndihesh e lirshme të përjetosh ndjesinë ashtu sic do. Nuk është e thënë të përjetojmë ndjesitë sipas klisheve e formateve sociale të gjinive përkatëse.
Është ok edhe kur përjetojmë konfuzion apo kaos, pasi kjo do të thotë që nevojitet të kuptojmë e të njohim më mirë veten, kështu që të këshilloj ta perceptosh e mendosh si një rrugë që duhet të përshkruash.
Nuk mund të dish se cfarë do apo kërkon në rast se nuk i jep shanse vetes të ndërtosh marrëdhënie. Dil, njih, kupto cfarë do, përpiqu të njohësh veten tënde, nga cfarë shmangesh, cfarë të drejton.
Do të këshilloja që më shumë se të vendosësh veten në kërkim (apo zgjedhje) të preferences seksuale, të vendosësh veten në kërkim të personit e shpirtërores që do të bëj të ndihesh mirë, pa i bërë presion as vetes dhe as tjetrit.

Të uroj gjithë të mirat në eksplorimin drejt njohjes së vetes,
Je e mirëpritur të na shkruash sa herë që dëshiron,
Gjithë të mirat,