Dr. Blerta Bodinaku says:

Përshëndetje Flor,

Nga përshkirmi që i bën gjendjes tënde, duket sikur po përjeton çrregullim paniku. Çrregullimi i panikut dhe çrregullimet e ankthit në përgjithësi, janë shqetësime serioze, të cilat pengojnë funksionimin e përditshëm dhe zbehin kënaqësinë e të jetuarit.
Duke qenë se shpesh herë ataket e panikut, duket se vijnë pa asnjë arsye të dukshme dhe të shoqëruara me një sërë simptomash fizike, të tilla si rrahje zemre, takikardi, marrje mendsh, mpirje, përzierje, etj. shpesh njerëzit i keqinterpretojnë këto simptoma si probleme të zemrës, apo probleme të tjera të shëndetit fizik. Edhe pasi mjekët i sigurojnë personat që nuk kanë asnjë problem të shëndetit fizik, mendimet dhe interpretimet katastrofizuese që aktivizohen kur fillojnë simptomat e ankthit, i bëjnë këto simptoma të intensifikohen dhe rrjedhimisht i bën personat që vuajnë nga paniku të kthehen edhe një herë tek mjeku për t’u siguruar që nuk kanë asnjë problem vdekjeprurës.

Nuk ka asgjë të keqe të bësh një kontroll të përgjithshëm shëndetësor në fillim, kur simptomat shfaqen, por rikthimet e vazhdueshme tek mjeku për t’u kontrolluar mundet ta përforcojnë ankthin dhe panikun. Pas çdo kontrolli mjekësor ku mjeku ju garanton që nuk keni asnjë problem të shëndetit fizik, ju përjetoni qetësim të menjëhershëm, i cili me gjasa zgjat vetëm pak ditë. Pikërisht kërkimi i këtij qetësimi,do t’ju bëjë të ktheheni e riktheheni vazhdimisht tek mjeku për t’u kontrolluar dhe për t’u siguruar që nuk keni arsye për të vdekur. Por kjo gjë rrezikon të kthehet në një cikël, i cili në afatgjatë do të përforcojë ankthin tuaj në vend që t’ju ikurajojë të përballeni me të.

Mënyra më e mirë për t’u përballur me ankthin është të kërkoni ndihmën e një profesionisti. Në Shqipëri e Kosovë ka tashmë psikoterapistë të mirëfilltë të kualifikuar për të punuar me çrregullimet e ankthit. Kërkoni një psikoterapist dhe punoni me të për të identifikuar mekanizmin që e aktivizon dhe mban të gjallë ankthin tek ju si dhe të ndërtoni mekanizma të përshtatshëm për t’u përballur me të. Në rast se nuk mundesh të drejtohesh tek një psikoterapist i kualifikuar, mund të drejtohesh tek një mjek psikiatër dhe të marrësh mjekimin e përshtatshëm, por kurrë mos e fillo atë vetë pa u konsultuar më parë me mjekun. Shumë studime sugjerojnë që kombinimi midis psikoterapisë dhe mjekimit farmakologjik është një mënyrë shumë e mirë për të punuar me panikun apo çrregullime të tjera të ankthit, veçanërisht në rastet kur çrregulliimi është i ashpër dhe kufizues i funksionimit. Megjithatë besoj se kjo është një çështje për t’u diskutuar me psikoterapistin/en tënd/e.

Shpresoj që sa më shpejt të drjetohesh tek një profesionist i besuar dhe të marrësh ndihmën e nevojshme për t’u përballur me ankthin e panikun dhe për të rigjetur gradualiisht kënaqësinë e të jetuarit pa frikë.

Të uroj gjithë të mirat,
Blerta