Aida Yzeiri says:

Përshëndetje e dashur!
Të falenderojmë që na ke shkruar duke ndarë shqetësimin dhe gjendjen tënde. E kuptoj shumë
mirë sa e vështirë është të jesh në kontroll përballë mendimeve të padëshirueshme dhe dhimbjen
që shkaktohet nga kjo.
Nga këto pak rreshta që ke shkruar nuk arrij të kuptoj qartë nëse ndjenja e fajit të vjen prej
dickaje që të ka ndodhur apo vetëm nga mendimet që ke? Cfarë situate ka qenë? Cilat janë këto
mendime që të shqetësojnë? A ka diçka apo është dikush, që të nxit këto mendime?
Pavarësisht se çfarë ka ndodhur apo se çfarë mendimesh të vijnë është e rëndësishme që të
kuptosh, që mendimet dhe ndjenjat janë kalimtare. E rëndësishme është se çfarë vendosim të
bëjmë dhe të pranojmë si mendime të vlefshme dhe të gjejmë zgjidhje brenda mundësive për
problemet që kemi.
Prandaj në këto momente krize së pari do të thoja të merrje kohë për të qetësuar veten sikur edhe
për të bërë disa frymëmarrje të thella që qetësojnë trupin dhe mendjen.
Mendimet negative që të vijnë mund të fillosh t’i shikosh edhe me një sy kurioz, sesa thjesht të
duash që të ikin sepse janë të padëshirueshme. Mund të ndihmojë t’i bësh vetes pyetje të tilla si:
Pse po më vjen ky mendim? Çfarë qëllimi ka apo dëshire vjen prapa tij? Çfarë dëshiron të më
tregojë? Cfarë mund të bëj tjetër për të dhënë një zgjidhje më të mirë dhe që është e pranueshme
nga unë?
Shikoji këto mendime më tepër me kuriozitetin se çfarë duan të tregojnë dhe për të kuptuar më
mirë veten.

Duke parë që ke edhe këto impulse “shkatërruese” do ishte e domosdoshme të kontaktoje një
psikolog për të ndjekur sesione këshillimi apo psikoterapie pasi në momente të vështira
emocionale nuk mund të përballohen të gjitha vetëm. Psikologu si profesionist në këtë fushë do
arrij të drejtojë më mirë në të kuptuarit e situatës, të këtyre mendimeve që të shqetësojnë si edhe
të gjeni së bashku mënyra përballuese, që funksionojnë më mirë për ty.
Gjithashtu do të ndihmonte që të flisje për këtë me njerëz të afërm apo shoqëri, të cilët mendon
se mund të jenë mbështetës për ty.
Të uroj lehtësi dhe të jesh sa më mirë!
Aida