Uarda Beçerri says:

Përshëndetje Anti dhe faleminderit që keni ndarë me ne shqetësimin tuaj.
E kuptoj vështirësinë me të cilën po përballeni dhe më vjen keq.
Kjo që ju ndjeni provokon një ngarkesë shumë të madhe në psikën tuaj dhe ju vështirëson jetesën përmes mendimeve të mundimshme.
Unë dëshiroj shumë t’ju ndihmoj dhe do ndaj me ju disa këshilla që uroj të ndryshojnë disi mendimet tuaja.
Si fillim, provoni të analizoni mbi çfarë ndjeni duke praktikuar kështu teknikat e ndërgjegjësimit, të cilat mund t’ju ndihmojnë të bëheni më të ndërgjegjshëm për mendimet dhe ndjenjat tuaja pa i gjykuar ato. Ndërgjegjësimi mund t’ju ndihmojë të menaxhoni më mirë impulset tuaja.
Mundohuni të punoni në sfidimin dhe rikthimin e mendimeve negative dhe iracionale që shtyjnë kompulsionet tuaja në mendime pozitive (përmes nxitjes verbale- thuaja vetes me zë të lartë atë që kërkon të bësh).
Ekspozimi dhe parandalimi i reagimit është një formë e veçantë e dizenjuar për trajtimin e obsesioneve, e cila përfshin përballjen gradualisht me obsesionet tuaja pa iu përgjigjur kompulsioneve. Këtë mund ta kryeni gradualisht, duke e ngacmuar disi zonën komforte, por jo deri në pikën që provokohen ndjesi të fuqishme jo të mira.
Gjithashtu, mësimi i teknikave të relaksimit si frymëmarrja e thellë ose relaksimi i muskujve progresiv mund të ndihmojë të reduktoni ankthin që shoqëron obsesionet.
Një aspekt i rëndësishëm është dhe kujdesi për veten, i cili vjen duke u kujdesur për një dietë të balancuar, gjumë të mjaftueshëm, ushtrim fizik të rregullt si dhe të ndërtoni një rrjet mbështetjeje rreth vetes. Ndani me miqtë ose anëtarët e familjes përvojat tuaja dhe ata mund t’ju ofrojnë mbështetje emocionale dhe mund të ndajnë me ju informacion ndihmues dhe suportues.
Duke qenë se më thoni që për momentin nuk janë mundësitë të takoni një psikolog, unë do t’ju ftoja të merrni pjesë në chat-in live që zhvillon faqja jonë, të cilin mund ta verifikoni nëpërmjet rrjeteve sociale datën dhe orën e saktë se kur zhvillohet.

Ju falenderoj e pres të dëgjoj sërish nga ju,

Uarda